Just For Fun 周汶錡@ 快周刊 (20070508)

．周汶錡處世智慧很高，遇上任何批評指控或人身攻擊，輕描淡寫一句「Just For Fun」，便天下太平。
．舉例整容，夠負面吧，但經過她的腦袋思考分析，會詮釋為：「人同我開玩笑，Just For Fun！寫我都係因為我賣書，你估編輯唔識計數咩。」
．是的，識計數的不只是雜誌編輯，還有周汶錡。
．入行十五年，由硬照Model仔到香港第一名模；再晉身專欄作家、飲食節目主持，鋪路成為食家。近年還被稱為「才女」，地盤愈霸愈多。
．還未夠，去年客串做領隊，搭四個鐘頭飛機帶團到東京竹下通掃貨，面不改容力Sell幾百蚊一件的平價冷衫有幾靚有幾抵，都是她工作一部分。
．比起只懂拋胸攝位搶鏡的Model，戰鬥格的周汶錡更高招。
．「寫我得啖笑，最緊要廣告客戶明白，唔好影響我接Job。」
．唔靠男人冇富商照，九成九唔會（兼唔恨）嫁入豪門的周汶錡，告訴大家她仲有大把出路。
．這一句，不是玩的。
沒有化妝、只帶了一個助手傍身的周汶錡，約好她早上9點半來到影樓，電話9時20分已經響起，「我到停車場，你落接我。」
借來七、八套衣服，她數十聲已挑好三套心水的，然後化妝換衫埋位，相機的快門擦擦擦，她的甫士按節奏擺動，動作快狠準。
好好食呀
完工後，周汶錡才三扒兩撥消化了兩小時前的外賣炒米粉。留意，這裏不是法國餐廳，沒有鵝肝也沒有Candlelight，周小姐依然大啖食。這一刻，我會用「專業」來形容她，但我一度懷疑自己眼花。
「我唔可以好似闊太咁日日行街買衫，我需要工作需要賺錢，我係個唔停得落人。」搵錢，其實不包括做訪問做宣傳，難得她樂於應酬。
「雜誌約我影相，我有時間都唔會推，盡量配合啦。」
周汶錡口中的「有時間」，其實都幾趕。訪問前一星期，她隔日便在名人版曝光，有錢落袋的客戶宣傳、冇錢收的畀面派對，她沒有厚此薄彼，扮到全場最靚出席。約這次訪問，她的經理人在電話中說：「剩番星期六朝頭早9點幾，中午又有Job，你唔要就要再等。」
印象中的名模，應該是得閒冇做到在置地歎Tea，然後返屋企換件衫等男友接食飯，隔幾個月便出埠滑雪……
周汶錡呢？工作編排得比電視台的包薪姐仔還要密。
「我兩日後又要飛上海，去做旅遊書，周圍採訪。呢幾年推出的旅遊書、食書，外面反應都幾好，電視台監製睇到我書，會有個疑問『乜Model都識食咩？』，於是就搵我試，反應又出奇咁好，自此好多節目都搵Model做主持，我覺得自己搵路線。」周汶錡做主持稱職嗎？坊間評語也不過不失，賣相足夠彌補口才不足。
「講食真係好難，唔係淨係識得講『好食』就得，講得多都要諗過其他形容詞，但又唔可以用高八度把聲話『嘩，好好食呀』，所以好難掌握。」
唔想做Artist
一個模特兒壽命有幾長？周汶錡心知肚明。轉型，理由來得很漂亮。
「咁我鍾意玩鍾意食，出書對我來說，是平凡中的不平凡，不會當是一盤生意去做，好多都唔想太商業化。」
這兩三年，周汶錡的地盤很多，產量包括一年出兩本旅遊書、教人做新娘的結婚手冊；繼而踩入電視台主持飲食節目《回味無窮》及《原裝入口》，加上從未間斷的廣告剪綵、半打雜誌專欄，還有去年為矮她成個頭的側田在演唱會上伴舞，搶手度絕不比一線女星遜色。
「係呀，一直都有唱片公司搵我出碟，但我推晒，講真我唔想做Artist，我由Day One開始就係Model，呢個身份唔會變。」
幾年前玩票性質接拍電影《戀情告急》做古天樂女友，都是半推半就。
「導演話個角色好適合我，都係做番Model，點知由兩組戲加到六組，但我好難投入到角色，太急趕的工作唔適合我，套戲首映時我睇過一次，就冇再翻睇，你話我獎就拎出睇自我陶醉，又唔係。」
模特兒以外的工作，除了間中客串做主持，其他的雜項，她都顯得不在乎，「拍廣告唔使出聲，要出聲Job我唔會做。」
周汶錡說，她不像妹妹周麗淇，注定吃娛樂圈這口飯。
「她很捱得，拍通宵戲個樣都仲咁精靈；就算未見過對手，一埋位已經可以談情說愛，我真係做唔到。」
有些模特兒恨拍戲恨到出口，周汶錡則自動閂後門。「如果要我再拍，一定要有好多時間畀我熱身，又要畀時間我同對手培養感情，我咁多要求，相信都冇導演會搵。」周汶錡的想法，不難理解，既然已做了模特兒界的Top One，點解要紓尊降貴做影壇新丁？有了一定地位，就是不能返轉頭。
回到未紅時，周汶錡每個星期都穿四吋高跟鞋、手挽放滿Profile的布袋，在中環、尖沙咀的影樓、辦公室四圍Casting，每天回家都要用暖水按摩小腿。
「那時冇助手乜都要自己一腳踢，我連模特兒公司都冇簽，自己接Job自己傾價錢。」周汶錡笑言，最好搵的是拍美容廣告，「淨係對住鏡頭笑，做幾個洗臉潑水動作，唔使點用腦，錢搵得好輕鬆，所以我一直冇諗過選美，亦都唔恨拍電影，冇信心我唔會做，咪搞。」
從表面證供推測，32歲的周汶錡照計可以提早上岸︱︱即係唔使點做幾個月才曝光一次，一年拍一個大型廣告那種工作模式。
這幾年間，她的男友由杜德偉換上連戰之子連勝文，近年的法籍珠寶公司太子爺男友Julien，也有點家底。娛樂新聞炒得最熱的，是她與男友在貝沙灣共賦同居。
女人三十過外，有男人可以依靠，畢竟是一種幸福。
貝沙灣這個小海岸，雖然比不上台灣海峽，總算比上不足比下有餘，但她從來不承認。
「我唔想乜都畀人睇晒，想留番少少私人空間畀自己，點解要話畀你知我住邊？同邊個住交幾錢租，唔通都要話晒畀你知咩？」
問題其實並不在她住貝沙灣定小西灣，周汶錡清楚知道，因為她夠紅，關於她的八卦新聞仲有市場價值，所以我又忍唔住問：殼王有冇送過樓畀你？
「每次記者話有，我都會叫佢拎證據出，如果冇證據唔該畀番層樓我，哈哈。」冷靜下來後，話題終於由「住邊」同「送樓」拉到她零瑕疵的粉臉上。
「一個女仔畀人話係人工美女，梗係嬲啦，你當我變魔術咩，呢本話我隆胸，第二本又笑我平胸，又話我整下巴，呢個係沒完沒了話題，點解我要去證明，凡事都要講證據，有本事咪搵個醫生出囉，又或者等我老囉，睇會唔會走樣變形，呢呃唔到人。」
觀點與角度
．周汶錡的死穴，最致命的應該是整容，至少訪問前我這樣認為。
．事實是，當時人早見怪不怪，或習慣性見招拆招了。
．「雜誌成日搵我以相出登，話呢個角度下巴尖，個角度下巴圓，咁每張相燈光都唔同，如果咁就話我整容，好好笑囉。
．「惟有阿Q少少去諗，寫我都係因為我賣書，你估編輯唔識計數咩，你賣書都係想賺錢，有錢賺先有人工加，我都想你好，大家都望大家好啦。」
．答案大方又得體，適當時候語帶雙關。「你有你寫，我唔想回應乜，有人會選擇不停講講講，又或者喊住上封面澄清，如果我想出位，我都可以咁做，不過我相信咁做會好快消失囉。」女人，有時都可以幾絕。
．希望有關人等不會被周小姐開口中。

EQ很高的女人:boy09:

所以我都無睇字, 只睇相 :lol :lol :lol


[quote]原帖由 [i]2001HK[/i] 於 2007-5-10 19:25 發表
咁多字呀...!!:funk: :( [/quote]

又幾好bor

D字真的不錯:boy09:

too small